Duka for duell mellom brødrene Bø
Brødrene Johannes og Tarjei Bø er klare for ein ny skiskyttarsesong. I år trur dei søskenduellen blir tettare enn nokon gong.
Yngstebror Johannes har gått sigrande ut av duellen mot Tarjei dei siste åra. I fjor hadde han ein svært vellykka sesong som blant anna bestod av OL-gull på normaldistansen. I år har motivasjonen vore dårlegare enn før.
– Med utladning etter OL, bryllupsplanlegging og bryllupsreise, har det vore eit tungt år motivasjonsmessig. På privaten har 2018 vore perfekt. Eg gledar meg til å kome i gang med sesongen, og trur eg har lagt ned ein god jobb i år og, fortel Johannes Thingnes Bø.
Sjølv om motivasjonen har vore så som så, set den olympiske mesteren seg høge mål for sesongen.
– Eg har som mål å kjempe om samanlagtsiger i verdenscupen, samt å ta tre medaljar i VM – og minst éin av edlaste valør.
Duell mot Fourcade
I år, som tidlegare, trur Johannes det blir ein duell mellom han og Martin Fourcade.
– Duellen med Fourcade har vart i fleire år, og vil nok vare i lang tid framover. Det er godt å ha konkurrentar som verkeleg byr opp til hard konkurranse – og desto kjekkare er det å slå han, helst med minst mogleg margin.
Johannes trur storebror Tarjei vil puste han i nakken komande sesong.
– I år har Tarjei trena veldig godt, så det blir utruleg spanande å sjå om eg har tapt forspranget eg har hatt på han i det siste. Eg trur Tarjei får sin beste sesong på mange år, fortel Johannes.
Vil vinne renn
Tarjei seier seg einig med Johannes.
– Eg har ein god følelse no før sesongen. Denne hausten har alt gått på skinner og eg føler meg sterk. Med lite sjukdom dei siste tre månadane blir eg i betre form kvar veke. I tillegg vann eg NM i rulleskiskyting for første gang dette året, og konkurranse gjev dei beste svara på korleis ein ligg an, seier eldstebror.
Målsetjinga komande sesong er å vinne konkurransar, samt å utfordre Johannes.
– Målet er å vinne både verdenscuprenn og VM-gull. Eg håpar også å utfordre Johannes. Han var vanvittig god forrige sesong, men eg trur eg er nærare han denne sesongen. Johannes er ein luring som alltid finn formen, så det blir sjølvsagt vanskeleg å slå han i verdscupen samanlagt, avsluttar Tarjei.
For skiskyttarane startar sesongen på Sjusjøen 24. november.