Kor skal matavfallet?

Befolkninga vert stadig oppfordra til å kjeldesortere, men på P48 på OsloMet er det berre éin plass ein kan sortere matavfallet sitt. På dei andre miljøstasjonane rundt om i bygget er det berre laga plass til å kaste restavfall, papir og plast.

– Det gjer det vanskelegare å ta gode val, seier studentane Bettina Mork-Trondal og Ingrid Lauvsnes.

På ein lapp ved miljøstasjonane vert ein henvist til fyrste etasje for å kaste matavfallet. Dette er den einaste plassen i bygget det er mogleg. Mork-Trondal synst det er synd at det ikkje er fleire plassar, og trur at mange vel å kaste matavfallet i til dømes restavfall i staden for å gå ned i fyrste etasje.

– Mange på vår alder er opptatt av å vere miljøvenlege, men systemet må vere på plass for at det skal vere lett å ta dei gode vala, seier ho.

Skitne plastbeger og papirposar med mat i

Husøkonom ved OsloMet, Marit Spicer, forklarar imidlertid at grunnen til dette er fordi studentane ved OsloMet generelt er for dårlege til å sortere.

– Den dagen studentane klarar å sortere papir og plast ordentleg, kan me sette ut matavfall, fortel ho.

Ho fortel om skitne plastbeger i plastavfallet og papirposar med matrestar som hamnar i papiravfallet. Alt dette hamnar dermed i restavfall fordi det er ureint og ikkje sortert riktig.

– Reinhaldarane si oppgåve er ikkje å sortere avfallet til studentane. Det skal heller ikkje vere naudsynt i 2022, seier ho.

I tillegg forklarar ho at det vert brukt mange plastposar i samband med kjeldesortering. Tidlegare var planen at restavfallet skulle verte tømd kvar dag, medan plast og papir skulle verte tømd 1-2 gongar i veka. 

– No må me tømme alt kvar dag fordi det er så mykje som er ureint. 

Spicer legg til at enkelte er veldig flinke til å kjeldesortere, og at om ein ikkje veit kor ein skal sortere avfallet sitt, så benyttar ein restavfallet. Ho oppfordrar også studentane til å kome med innspel til korleis løyse problemet. 

– Draumen er jo at me skal få det til, avsluttar Spicer.