Roa valnervane med lang shoppingtur

- Vi får nok sjå ei svært opplagt Liv Signe snart. Vi har nemleg vore ute og shoppa saman i dag, så outfiten hennar er fantastisk, smilte ei glad og litt nervøs Sandra Borch.

Leiaren i Senterungdomen let seg intervju like før partileiar Navarsete gjekk på talarstolen under Senterpartiet si valvake.

- Liv Signe har vore kjempebra i valkampen, trass i mykje tyn frå media. Vi har satsa på dei lokale kandidatane og lokale medieoppslag, og grasrota har jobba fantastisk, sa Borch.

- Fantastisk fin dag

SP-HANS-OLAV2.JPGSå kom Navarsete inn, til stormande jubel. Smila var store, for alle dei sentrale politikarane såg, ifølgje målingane, ut til å behalde plassen på Stortinget. Både Trygve Slagsvold  Vedum, Marit Arnstad og Navarsete sjølv.

- Det er klart det er betryggande å sjå. Vi kjempar for kvart einaste mandat, og vi er eit parti som trengt i norsk politikk, sa Navarsete til Journalen like etter talen.

- Alt tyder no på at vi kjem tilbake om lag som sist i 2009, noko som er ei enorm tillitserklæring frå veljarane etter åtte år i regjering. For all teori tilseier at dei minste partia blir hardt skamfare, slik for eksempel Kristeleg Folkeparti blei etter sitt samarbeid med Høgre i 2005, sa partileiaren i Senterpartiet vidare.

Når ho får spørsmål om oppladninga før valvaka, kjem eit lurt smil følgt av latter frå Navarsete.

- Ja, eg og Sandra var på shopping i dag, noko som var utruleg kjekt. Eg har hatt ein fantastisk dag, med treningstur i Frognerparken, frukost med mannen min og ein lang tur med Senterparti-folk i marka. Og så blei shoppingturen ei perfekt oppladning før valvaka.

Inne i ei boble

navarsete stortingetSenterpartileder Liv Signe Navarsete på vei til Stortinget.(Foto: John Christian Nygaard)For Navarsete blir det stortingsplass, men for Borch blir det for tøft - som andrekandidat i Troms.

- Det blir kjempespennande utover kvelden. Eg kjenner at, off ... Det blir ein lang kveld, sa Borch litt tidlegare på kvelden.

Ho gler seg over eit sterkt Senterparti, men ser òg det positive i noko anna:

- Det er veldig bra at Framstegspartiet går ned såpass som dei gjer, slo Borch fast, før ho fortalte at ho var langt inne i ei boble medan stemmene fossa inn.

Takkar mannen

Navarsete på si side var både opplagt, og slo fast at skuldrene var låge like før den korte gåturen til Stortinget.

- Ja, skuldrene er låge, for slik prognosane ser ut meiner eg vi i Senterpartiet har all grunn til å vere fornøgde. Så får vi vente og sjå på oppteljinga, for siste ord er ikkje sagt.

Gjennom ein lang valkamp, med både kritikk, gjentekne medieoppslag og hektiske kvardagar, seier partileiaren vidare at éin mann har hatt mykje å seie for ho.

- Mannen min har vore ei klippe, både i og utanfor valkamp. Eg har veldig mykje å takke Lars Petter for.

Mannen hennar Lars Petter Nesse, som er varaordførar for Senterpartiet i Lærdal kommune i Sogn og Fjordane, har alltid stilt opp, forklarer Navarsete.

- I det heile er familien utruleg viktig for meg, både Lars Petter og ungane våre. Det har vore ei enorm støtte å ha dei på laget, avslutta Navarsete før turen etter kvart gjekk til Stortinget.