Vil ha tilbake tilbod for jenter

- Vi har som første steg valt å organisere to uoffisielle jenteskatetider i Oslo Skatehall og i Skur 13. Dette for å vise at vi også er ei gruppe som tar plass i hallen, seier Rebekka Strand, ein av jentene i jenteskate som no har starta underskriftskampanjen som per dags dato har fått nær 200 underskrifter. 

Jenteskate mista tider i skatehallen 

Bakgrunnen er at Oslo kommune vedtok å gi nye brukargrupper tilgang til Oslo Skatehall, som resulterte i at jenteskate mista sine tider i skatehallen. I eit skriv frå Bymiljøetaten i Oslo kommune står det: 

“Oslo kommune har besluttet at brukere av sparkesykkel og brukere av aggressive inline også skal få benytte Oslo Skatehall. Dette er nytt i Oslo Skatehall, så vi ser på dette som en prøveordning inntil videre, med muligheter for endringer.”

Les også: Oslo Skatehall vil åpne for nye brukergrupper

Ingen skatearena for jenter 

Strand meiner at ein treng å setje fokus på tilbod for jenter i eit allereie mannsdominert miljø.

- Vi har byrja med ein underskriftskampanje for å vise kommunen at vi er engasjerte og fleire enn ein trur. Det er ingen offisielle tilbod for jenter i Oslo per dags dato, og vil nok ikkje endre seg før kommunen får hovudet ut av sanden. Skateboarding skal tross alt bli ei OL-grein, men Noreg har ingen arena for at jenter vil kunne trene eller delta, seier ho.